Notizie fresche e sicure: el virus de Bill Gates xe passà dal computer al pangolino e dal porco-prasac, al omo…

FIFI: Santissimi Vito, Modesto e Crescenzia, che remitur! Bon che el ano scorso ti ghe gavevi fato a tuti i auguri per un felice 2020! E pandemia e crisi economica e social e disgrazie…Saria meio che mi e ti la smetessimo de pensar al futuro e guardassimo un po’ indrio, che provassimo viver de ricordi, coss’ ti disi?
RIRI: Digo lassime star! E te prego, ghe no’ ti zucassi fora de la naftalina zerte date storiche, né centenari de el Stato Libero di Fiume, né Nadai de Sangue, né teste de l’aquila taiade…ne Zanella, né D’Annunzio, né Trattati de Rapallo, né Riccardi Gigante, né Pietri Micheletti né …gnente de gnente!

FIFI: Cossa, no’ te ga piasso le celebrazioni? E el convegno organizado da la Associazion Stato Libero di Fiume sui 100 ani del SLF. Cossa no’ te ga piasso el fato che certi temi che fino a poco tempo fa qua in Zità de Fiume i era tabù, i par esser stadi, per fortuna, sdoganai?
RIRI: Sì Stato Libero de Fiume, SLF, ma fame el piacer, che se ti lo giri come anagrama e ti ghe cambi una letera el te diventa LSD, che me par molto più utile de ‘sti tempi! Fario meio a far finta de esser tornada indio ai tempi de Woodstock e farme vegnir le travegole. Me podessi ficar in zuca de esser una de quele aquile che pol volar per vero… Te go deto lassime star che no’ go voia de gnente!

FIFI: Te facio l’oroscopo?
RIRI: Va in mona!

FIFI: Te facio portar su un cafè che ti te tiri un poco su el moral?
RIRI: No’ che i bar xe ciusi!

FIFI: McDodald’s xe aperto. Ghe xe la gente che speta in fila per ciorse capucini e patatine.
RIRI: E cossa, mentre che i mantien el distanziamento social tuti streti streti in fila sul Corso, dopo i tocia le patate frite in ‘tel capucino?

FIFI: E sarà abitudini americane, cossa te devo dir! Importemo civilizazion e abitudini da el Ocidente a biondo Dio, e sarà el caso che se abituemo a le patate frite tociade in ‘tel café, con la zonta de un poco de salsa ketchup al posto de la schiuma.
RIRI: No’ grazie. El café del Mc Donald’s no’ lo voio, anche per solidarietà con i proprietari dei vari caffè e ristoranti che in ‘sto tempo de pandemia i devi restar ciusi. Perché anche lori no’ i podessi restar aperti e far caffè de servir cussì, de fora, sul bancon? Perché Mc Donald’s sì e i altri no?

FIFI: Vero, perché Mc Donald’s sì e i altri no? Ma in ‘sto momento in cui tanti sta mal, in cui mori tanta povera zente, veci e giovani, ti sa che se dovessi evitar in tuti i modi che la zente fazi gheto, anzi, son sicura che se el Governo croato gavessi reagì co’ iera de reagir e no’ el gavessi messo davanti prima le elezioni politiche e dopo le colone per el aniversario de Vukovar, e no’ l gavessi portado avanti quela politica che in croato se ciama “’ko živ, ‘ko mrtav”…
RIRI:…deta anche “jebe se meni” basta che zuco da la mia un certo tipo de eletori…
adesso no’ se troveriimo in ‘sta situazion de merda.

FIFI: Ala su, i ne acusa sempre che semo volgari e sbocade e ghe stemo dando ragion. Moderemo un poco i toni. Te lo go deto de bon principio: perché no’ se podessi parlar solo che de ricordi e lassar star ‘sto momento cussì scuro? Ti vol che se contemo qualche bela storia de una volta?
RIRI: Ti te ricordi quei bei tempi de la influenza spagnola, co’ i cascava partera come le mosche?

FIFI: Anche quela volta ghe iera politici che i faceva finta de gnente, perché i giovani doveva continuar a combater in ‘te le trincee (che la I guera mondial se doveva portar avanti, ghe era de mandar avanti la economia ecc.ecc.),
RIRI: Anche quela volta iera chi che no’ ghe credeva, che i diseva che ‘sta malatia non esiste…uguale come che dise ‘sti sturli che giorni fa i ga fato una specie de corteo de carneval e che i xe vegnudi qua soto in Corso a protestar contro el uso de le maschere e del distanziamento social…perché ‘sta roba ghe cava la libertà…

FIFI: Meio gaver la libertà de infetar chi che te par…no xe vero?
RIRI: …Lori i dise che ghe lo ga deto certi tipi che parla per ore davanti a una telecamerina e dopo i meti el filmato su You Tube, e ‘sti tipi ghe gavessi deto che la pandemia xe tuta una invenzion de i Illuminati…

FIFI: …perché i virus no’ i esisti, perché i xe una invenzion de i poteri forti…
RIRI: …perché se li ga inventà Bill Gates!

FIFI: I virus? Ma chi quel de i computer?
RIRI: Anzi, i sostien che xe tuta colpa de i virus de i computer che tut’in t’un i pol dar vita a una mutazion e infetar i pangolini, i pipistrei, i porchi, e de conseguenza, dal porco -prasac, passar ai omini. E el virus se lo ga inventà Bill Gates de sana pianta.

FIFI: ‘Sti virus del computer dopo i xe sbrissa su la Terra piata – perché oltre a esser piata, ‘sta Tera xe cussì lissa, che ghe se sbrissa come che sbrissavo mi su i parcheti de mia nona co’ la ghe passava sora la cera…
RIRI: E alora ‘sti virus de Bill Gates, mentre che i scivola per andarse sficar in qualche computer, i te incontra lungo el retilineo un Illuminato e i ghe dise: “Wee! Te go scoperto, so che ti comploti a le mie spale…”
LAURA: Scuseme, mi a ‘sto punto Fifi e Riri le go smesse de scoltar. Go la testa come un balon, lore ghe ne ga due, ma le ghe se ‘sta impinendo de rafia, me par. Ti vol o no’ ti vol, calumade là su la Tore, ghe capita de scoltar de tuto e de più, de tute le teorie che pol sbarar ogni d’un che ghe vien in testa una idea, che in vece de rigirarsela su la lingua, ingiutirla e dopo farghe un bel ruto sora, i ne le propina tramite megafono, facebook e social vari…e po’ ghe xe un fato, che ogi più uno sa poco, e più el insisti che el ga ragion lui e el crede de saver tuto. La Lucarelli la gaveva comentato e me gaveva ‘ssai piasso: “L’arroganza dell’ignoranza”. Ja: in ‘sti tempi de confusion, de depression, de mancanza de solidarietà e spesso de logica, sembraria che la zente, invence che sostegnirse a vicenda, i se diverti a passar el tempo a sostegnir teorie varie: uno le sbara e docentomila le sostien! Ma cussì, lontan da i esperimenti, dal pensiero empirico, i ga desmentigà, perché no’ i la ga mai veramente gnanche impardo, cossa che xe la discussion, cossa che vol dir scoltar le opinioni altrui e acetar che i altri te possi confutar le tue idee e dimostrarte che ti sta parlando monade. E no’ per questo el devi esser per forza tuo nemico e amico de i “poteri forti”.
Son un poco stufa de come che sta andando avanti ‘sto mondo, de come che el se ga messo a girar (anzi, no’ so più a ‘sto punto, se el gira o se el sta fermo, se el ga un proprio asse o el sta incugnado soto a una cupola fata de una qualche sostanza aerea). Bon, no’ so, ma per provar che son aperta de spirito e a la discussion, adesso vado far la fila davanti al Mc Donald’s per ciorme anche mi un capucino con le patatine frite, per poterghele tociar drento, magari zontandoghe sora un sbaffo de salsa ketchup.

FIFI & RIRI: (Che le faceva finta de tambascar per conto proprio e invece le scoltava): Jesus i Maria